Cebu City – Gipahinumdoman sa Archdiocese of Cebu ang mga simbahan ug mga deboto nga motuman lang sa minimum health standards sa pagsaulog sa mga Mahal nga Adlaw.
Atol sa Chrism Mass ug Renewal of Commitment to Priestly Service gahapon, si Cebu Archbishop Jose Palma subling mianunsyo sa guidelines sa Archdiocese bahin sa umaabot Semana Santa.
Gihimug-atan ni Palma ang instruksyon sa dili pagpasiugda og tapok-tapok sama sa Visita Iglesia ug prosesyon sa sunod semana.
Nagkanayon si Palma nga sa tibuok Sugbo, walay Visita Iglesia, walay procession ug ubang kalihokan nga hugopan sa katawhan.
Matod ni Palma nga ang mga parokya lokop sa lalawigan mopahigayon lang sa basic celebration sa Holy Week ug Easter.
Nangayog pagsabot si Palma sa publiko tungod sa nagsaka nga mga kaso sa COVID-19.
Karong tuiga, ang Semana Santa gikan sa Marso 28 ngadto sa Abril 3, way labot sa Easter Sunday sa Abril 4. (Jhon Tadlip/JTY)
(News & photo courtesy of The Roman Catholic Archdiocese of Cebu)