Cebu City – Nabalaka ang mga awtoridad sa dakbayan sa Sugbo nga ang kusog nga panginahanglan sa isda ug ubang produkto sa dagat sa Semana Santa moresulta sa pagsud sa dili luwas nga klase sa mga marine products sa kamerkadohan.
Si Ariel Yburan, pangu sa City Bantay Dagat Commission, mitambag sa mga mangomprahay nga magbantay sa ilang pagpamalit og isda kay basig makapalit silag kuha sa dinamita.
Giawhag ni Yburan ang mga pumapalit nga tan-awon ug hilngon pag-ayo ang isda nga buot nilang paliton.
Ang mga isda nga makuha sa dynamite fishing mamuwa ang mata ug manglumoy ang tiyan.
Midugang siya nga importante usang masusi ang tinai sa isda kay kon kini nadaot na, timailhan usab nga pinabuthan.
Ang mga konsumidor nga makabantay sa maong mga timailhan gihagit sa pagsumbong sa Bantay Dagat Commission o kaha sa MOD o Market Operations Division alang sa verification ug action.
Kon sila sa bantay dagat lay saligan naa gyoy makalusot sanglit random man ang ilang paghiling diin kon naa silay makit-an ilang pabuksan ang uban apan kon wala, palutson dayon ang kargamento.
(Jhon Tadlip/JTY)
(Source: Bantay Dagat Commission-Cebu City, photo courtesy of contributed photo)