Gisugdan na pagdawat niining semanaha sa 18 years old pataas ang CDO COVID-19 vaccination team nga sakop sa A4 category o essential workers subay sa prioritization guidelines sa Department of Health.
Kahinumduman tungod sa vaccine supplies, gihimong ‘by batch’ ang schedule sa pagpamakuna sa mga essential workers nga naglangkob sa private, government ug informal sectors diin gi-una ang mga 50-59 anyos, gisunod ang 40, 30, 20 ug karon 18 anyos.
Subay sa DOH prioritization guidelines, ang vaccine rollout sa syudad anaa na sa mga A1 expanded o kadtong mga ‘immediate family members’ sa mga healthcare workers ug ‘outbound OFWs’ nga ready for deployment within four months, A2 o senior citizens, A3 adult with comorbidities, A4 essential workers ug A5 o mga indigents nga sakop sa mga programa sa Department of Social Welfare and Development sama sa 4Ps o Pantawid Pamilya Pilipino Program, Unconditional Cash Transfer o UCT ug Social Amelioration Program o SAP.
Nakab-ot usab sa barangay vaccination site sa Bulua National High School ang daily target nga 500 vaccinees sukad Agosto 24, 25, 26 ug 27 nga moabot sa 2,255 ka mga first dose vaccinees ug dunay tulo nga second dose vaccinees.
Magpadayon karong adlawa ang rollout sa BNHS nga modawat na og 700 vaccinees. Samtang laing barangay vaccination site usab ang mag-abli karong adlawa diha Cugman Elementary School nga dunay target nga 500 vaccinees.
Sa paningkamot nga mapaspasan ang pagkab-ot sa ‘herd immunity’ sa syudad batok COVID-19, pabiling abli karong adlawa ang mega vaccination sites sa Limketkai, SM Downtown ug Robinsons.
Sa laing bahin dul-an 800 usab ka mga persons deprived of liberty ang malampusong natupokan sa first dose sa COVID-19 vaccines sa ikaduhang hugna sa on-site vaccination sa BJMP, Lumbia city jail niadtong Agosto 24-25.
(Source: City Health Office)