Suportado sa mga miyembro sa General Santos City Chamber of Commerce and Industry Inc. ang panawagang dugang benepisyo ug usbaw sa suhulan alang sa local labor sector, taliwala sa nasinatiang kapitos, nunot sa Covid-19 pandemic.
Sa usa ka pamahayag, giasoy ni Chamber president Elmer V. Catulpos, nga ang mga yanong trabahante ang maoy tinuod nga nagpadagan sa ekonomiya sa siyudad, gani angay lamang nga matagad sa gobyerno ang dugay nang panawagan sa mga nasampit sa ilang paigong suhulan ug benepisyo.
Luyo sa nasinatian usab nga krisis sa business sector gumikan sa pandemiya, nasayod si Catulpos nga kinahanglang adunay mamugna nga “win win” nga solusyon ang panggamhanan kung paunsa mabalanse ang interes sa mga negosyante ug sa libuan ka mga trabahante sa siyudad.
Una nang nanawagan ang Chamber ngadtu sa LGU sa balanse nga pagpatuman sa mga polisiya, partikular ang gimando nga stricter border control, aron dili usab matanggong ang panginabuhian sa mga trabahante. (John Rey Somido)