Walay napupho ug kutob na lamang sa pagpanghupaw ang tag-iya sa usa ka panimalay human gilamoy sa kalayo ang iyang pinuy-anan kaganihang alas 3:00 sa kadlawon, Agosto 5, 2024 sa Zone 1, Barangay Tiguma, Pagadian City, Zamboanga del Sur.
Ang maong panimalay gipanag-iyahan ni Ervin Calumba, hingkod ang pangidaron, bulag sa asawa ug residente sa naasoy nga dapit.
Sigon pa ni Calumba nga samtang naglingaw-lingaw siya uban sa iyang mga katrabaho ug anak human nadawat ang ilang sweldo, adunay nipahibalo kaniya nga nasunog na ang iyang pinuy-anan.
Daling nipauli ang biktima ug mao na lamang ang iyang naabtan nga nagsugod na’g kaugdaw ang iyang balay ug bisan unsang gamit wala na siya’y nasalbar pa.
Gibutyag usab niya nga wala na sila nakapangayu ug tabang sa BFP tungod sa karatol sanglit paspas ang pagkuyanap sa kalayo ug kadlawon na kini nahitabo.
Subay sa inisyal nga taho, anaa sa kapin 30,000.00 ang gibana-banang danyos sa naasoy nga sunog.
Nanawagan karun ang mga nasunugan ug hinabang sa gobyerno sanglit wala na kini laing kadangpan.
(Source: Pagadian News Daily)