Upat ka akusado sa kahiwian sa pagpabarog sa lamp post niadtong nagsingabot pa ang Association of Southeast Asian National o ASEAN Summit sa 2007 sa Sugbo ang gikombikto sa Sandiganbayan.
Ang upat nga gilangkoban sa tulo ka kanhi opisyal sa Department of Public Works & Highways o DPWH 7 Director Robert Gingging Lala, Pureza Fernandez-ang kanhi officer-in-charge-chief sa maintenance division, Agustinito Hermoso- sakop sa Bids and Awards Committee (BAC) ug usa ka pribadong tawo nahukmang sad-an sa kasong kalapasan sa RA 3019 o anti-graft & corrupt practices act.
An Sandiganbayan 6th Division misentensiya sa upat ka akusado og unom ngadto sa walo ka tuig nga pagkabilanggo.
Gawas niana, dili na usab sila makahupot og puwesto sa bisan asang opisina sa gobyerno.
Gipakanaog ang maong hukom niadtong Sept. 29 nga pirmado ni Presiding Justice Amparo Cabotaje-Tang, Associate Justice Kevin Narce Vivero, Sarah Jane Fernandez ug Karl Miranda.
Ang maong kaso nagsumikad sa giingong pagpasobra sa presyo sa mga decorative lamp post para sa ASEAN summit nga moagi og public bidding.
Ang naasoyng mga ekipo napalit sa GAMPIK Construction and Development Inc. ug gitaod o gipabarog sa dagkong kadalanan sa mga siyudad sa Lapu-Lapu ug Mandaue.
(Jhon Tadlip/ JTY,  photo courtesy of PolitEkon)
(Source: Sandiganbayan 6th Division)