CAGAYAN DE ORO CITY- Usa ka 54 anyos nga lalaking Pinoy ang konpirmadong positibo sa coronavirus disease (COVID-19) nga naa karon gipahiluna sa usa ka isolation room sa Northern Mindanao Medical Center, NMMC nga nahimutang dinhi sa Cagayan de Oro. Matud pa ni Dr. Ian Gonzales, ang Department of Health- Northern Mindanao Infectious Disease Cluster Head nga ang maong pasyente unang gipatambalan sa dakbayan sa Iligan ug girefer karon sa NMMC.
Ang travel ug contact history sa pasyente ang kamulo pang gisuta hangtud sa pagkutlo ning maong report. Usa siya sa gikatahong 16 ka mga konpirmadong Covid-19 kagahapon, Miyerkules sa hapon, Marso 11. Nasayran nga kagahapon, moabot na sa 49 tanan ang konpirmado sa kaso sa maong sakit sa entiro nasud sa Pilipinas.
Si Dr. Gonzales nagpahimangno sa publiko nga batunan gayod ang kanunay nga pagpanghugas sa kamot, likayan ang tapok-tapok, dili moubo kon walay tisyu o panyo, magbutang ug mask kon nagmasakiton ug sayo magpakonsulta kon adunay balatian.