Dali tagdaya sa Caraga Regional Hospital an 37 anyos na layaki kini human gipusil sa isa sa tuyo ka waya mailhing suspetsado sakay sa isa ka motorsiklo nga sniper ug wayay plate number. Nahitabo an pagpamusil sa may Pantalan 1, Brgy. Washington sa alas 12:00 sa kaadlawon, Disyembre 03, 2020.
Nakilay-an an biktima nga si LOUIE TESIORNA JAYME, ulitawo, residente sa Don Julio, Canlanipa Homes, Brgy. Canlanipa, Surigao City.
Basi sa inisyal na imbestigasyon ni PSSgt. Joen Zabala, an biktima gikan nitambong sa birthday party sa nahisgutang lugar apan sa ija pag uli an may tuyo ka mga suspetsadong layaki an nag-atang sa dayan hampan an driver an miduol ug mipusil sa biktima ka duha nga naigo sa ija tuo nga abaga.
Dugang pa sa imbestigasyon nga an suspek an jaon sa 30 ngadto sa 35 an pangidaron, itomon, sakto ra an lawas, sanan waya mag sukbot nan face mask. Human sa insidente dali misibat an mga suspetsado pasingod sa boulevard nga direksyon.
Sa crime scene may duha ka kapsula sa .45 nga pusil an nakit-an sanan dugo gikan sa biktima. Sa pagkakuman nagpahigayon nan dugang imbestigasyon an kapulisan sa posibling pagdakop sa mga responsabling suspetsado. (Mark James Lisondra, Ronda 21, RPN DXKS Surigao)