Tres personas el ya iri cuando ya man bangaan el dos motorsiclo na costa oeste de este ciudad, asegun con el policia local del Domingo. Asegun con el policia, el accidente ya ocuri mga alas 11:40 del Sabado aga na Sitio Agrarian, Barangay Patalon, na costa oeste de este ciudad. El policia ya nombra con el mga victima como canda Roland Rabanes, 27 años el edad; Gerwin Macoycruz, 36; y si Edwin Aquilla, 69. Base na investigacion, ta maneja motorsiclo si Rabanes desde Barangay Sinubong para na Barrio de Labuan mientras si Macoycruz ta maneja tamen motorsiclo y ta sigi ancas conele si Aquilla desde Labuan para na pueblo cuando ya man bangaan sila na camino. Asegun con el policia, ambos motorsiclo el ya destrosa mientras todo sila tres—Rabanes, Macoycruz y Aquilla—ya iri na diferente parte de cuerpo. Con Rabanes ya lleva para na Labuan General Hospital mientras con Macoycruz y Aquilla ya lleva na Zamboanga City Medical Center para el curada medical. (B. Garcia) Zamboanga: Trabajante de construccion arestao por el asunto de ‘qualified theft’