GENERAL SANTOS CITY – Nasa 105 na mga local at overseas employers ang lalahok sa isasagawang 2018 Treasures of Region 12 Trabaho Negosyo at Kabuhayan (TNK) Job and Business Fairs ng Department of Labor and Employment (DOLE) sa SM City General Santos sa November 15.
Ayon kay DOLE 12 Regional Director Sisinio Cano na maliban sa mga kompanya at employment agencies na kanilang inimbitahan, makikilahok din umano ang Department of Trade and Industry (DTI), Technical Education and Skills Development Authority (TESDA) at iba pang ahensya ng gobyerno na magbibigay ng pre-employment documentation services, business lectures, at employment coaching.
Kaugnay nito, hinihikayat ni Cano ang mga jobseekers na pumunta sa naturang job fair, magdala ng application letters, resume at iba pang credentials at ihanda ang sarili lalo na sa job interview upang tumaas ang tyansa na makakuha ng trabaho.
Lalahok sa pre-employment documentation processing ang SSS, Philhealth, NBI, DFA, Pag-ibig, BIR, POEA, OWWA, RTWPB, ECC, OSHC, NRCO, NCMB,NLRC, at iba pa.
Maglalagay din ang DTI 12 ng Negosyo Center Desk at Business Fair habang may showcase naman ng Skills Demo and Services ang TESDA 12.