Cebu City – Gikuwestiyon sa taga oposisyon ang tinguha sa kagamhanan sa dakbayan sa Sugbo pagpalit og napu ka yunit sa coaster nga kantidad og 45 milyon ubos sa mayor’s office.
Ang naasoyng badyet nalakip sa P985-milyon nga fourth supplemental budget (SB 4), nga gisugdan pagtuki sa konseho niadtong Biyernes.
Si Joan Quiñanola sa mayor’s office miingon nga ang maong mga sakyanan gamiton sa paghakot sa mga pasahero nga matanggong sa dan tungod sa kakuwang sa sakyanan.
Atol sa special session, gipasabot ni Quiñanola nga bisag namalik na pagbiyahe ang tradisyonal nga mga dyip apan dili pa tanang rota ang na serbisyohan.
Apan ang mga konsehal sa oposisyon mipadayag sa ilang reservation sa maong lakang.
Si Konsehal Franklyn Ong, presidente sa ABC o Association of Barangay Council ug kapitan sa Brgy. Kasambagan, mipadayag nga ang executive department mas maayong mangitag mas barato nga transaksyon.
Suma pa ni Ong, naay mga modernong public utility bus nga mobili lang og tag-₱ 2.5 milyon ang usa nga layo ra sa tag-₱ 4.5 milyon nga coaster sa executive department.
Samtang si Konsehal Eugenio Gabuya, Jr. miingon nga mas maayong mohangyo na lang ang kagamhanang local sa mga operator sa PUV o public utility vehicle pagpadagan ug dugang yunit aron di na lang mamalit og kaugalingong sakyanan ang siyudad. (Jhon Tadlip/JTY)
(Source & photo courtesy of Cebu City Vice Mayor’s Office)
