General Santos City – Gi-kwestiyon ni Pmaj Oliver Pauya, Hepe sa Traffice Enforcement Unit Gensan, nganong nakapamasahero sa siyudad ang tricycle driver nga biktima sa road rage incident sa J. Catolico Avenue ning dakbayan milabayng adlaw.
Nasayran sa ilang imbestigasyon nga si Amerodden Linog, traysikel driver nga nasamdan sa komosyon, dili residente ning dakbayan. Apan, lumulupyo kini sa Brgy. Domolok, Alabel, Sarangani Province.
Kahinumduman nga nagpatuman ang Public Safety Office ug kamanduan nga ginadili ang pagpamasada sa mga traysikel driver nga dili taga Gensan aron muubos ang ihap sa mga traysikel ning dakbayan.
Gikondena usab sa opisyal ang pagbitbit niini ug kutsilyo nga ginadili usab sa mga otoridad. Ginasuta pa karon sa TEU Gensan ang kamatuoran human nga may nagkadaiyang bersyon ang mga nalambigit sa road rage incident.
Panawagan ni Pmaj Pauya sa mga motorista, dili dapat init ug ulo aron dili dali masuko sa mga gagmay lang na mga butang ug malikayan usab ang bayolente nga pamatasan sa kadalanan. (Jun Abelo)