Nahimong malamposon ang pagbukas sa “Taste of Dipolog 2 (habhabdipolog)” niadtong, Mayo 15, alas 5:30 ang takna didto sa Dipolog Boulevard.
Pinangunahan nila ni City Mayor Darel Dexter T. Uy ug Department of Tourism, Regional Director Dara May Cataluῆa, isip pinasidunggang bisita sa maong okasyon.
Isip pormal nga pagbukas sa maong programa, mipabati sa iyang mainitong mensahe ang kugihang mayor, nga gisundan sa hamubong mensahe usab gikan ni RD Cataluῆa.
Mokabat ngadto sa 20 ka stalls ang misalmot sa “habhabdipolog” kinsa mipahimutang sa ilang mga baligya sa twin commercial building sa nahisgotang lugar.
Gidugok usab sa daghanang mga katawhan kinsa misaksi, samtang ang uban usab ang mikaon gayud didto sa maong dapit.
Kahibaloan nga kining nasangpit nga “habhabdipolog” maoy ikaduhang hugna, diin tuyong gimugna aron sa pagpakita sa mga lokal nga produktong pagkaon nga gimugna dinhi sa atong dakbayan aron matilawan sa atong mga kaigsoonan ug mga dumuduong.
Kining nasangpit nga kalihokan ang nagsugod Mayo 15 ug molungtad hangtud Mayo 26, 2023.
(Source: Dipolog City Government Facebook page)