TANOD GITIGBAS SA MAG-AMAHAN
Gitigbas sa mag-amahan ang tanod didto sa Purok 4, Brgy. Hayanggabon, Claver, Surigao del Norte niadtong Domingo, Mayo 31 sa may alas 6:30 sa gabie.
Naila ang biktima nga mao si WILLIAM MOLLANIDA LAGAHIT, 55 anyos, ug lumulupyo sa nasampit nga lugar samtang ang mga suspetsado naila nga mao sila ni SABINO YAGAO ROLONA, 50 anyos, minyo, tricycle driver; ug JOSE FRENDO MAHINAY ROLONA, 20 anyos, ulitawo, wala’y trabaho; mga lumulupyo sa P4, Brgy. Taganito, Claver, Surigao del Norte.
Nasayran sa imbestigasyon, nga ang maong mga suspetsado ang miadto sa pinuy-anan sa biktima nga armado sa “Sundang”, ug sa wala’y igong hinungdan gitigbas sa suspetsadong amahan ang biktima nga naigo sa wala nga kamot, ug gisundan pagtigbas sa anak nga suspetsado ang biktima apan ang suot lamang nga tshirt sa biktima sa likod nga bahin ang naigo hinungdan nga nakadagan kini ug nakasulod sa iyang panimalay.
Nadakpan sa mga mirespondeng otoridad ang mga suspetsado ug detinado karon sa Claver Municipal Police Station.
Hisayran, nga ang motibo sa pagpanigbas mao ang personal nga dumot. (Jun Prex Salubre, Ronda 6 RPN DXKS)