Ginutigot ni Mr. Dany Daquioag, consultant ti Special Program ti opisina ni Gob. Matthew Marcos Manotoc iti Provincial Education Office dagiti iskolarti probinsia iti senior high school a mamagbalin iti panawenda a produktibo iti daytoy a panawen ti krisis.
Inallukoyna dagiti nadakamat nga iskolar a mangisayangkat ti ‘’gardening’’ wenno agmula ti natnateng ket ipatulodda kenkuana.
Kunana a napintas a maipakita ti kaadda ti nasayaat nga ar-aramiden dagiti iskolar bayat iti panagtalinaedda kadagit bukodda a pagtaengan.
Inbunannagna a babaen iti daytoy ket maipamatamat a dagiti iskolar ti probinsia ket pagwadan dagiti padada nga agtutubo.
Kabayatanna, ginutigot ni Dauioag dagiti academic ken TechVoc Scholar nga agserbi a ‘’fronliner’’ iti bukodda a barangay.
Imbatad nga imbes a limapulo nga oras ti iserbida ket tallopulo nga oras laengen ti ipaayda a serbisio iti barangayda.
Innayunna nga apaman a maileppasda ti tallopulo nga oras ket dumawatda ti sertipikasion ti punong barangay ken daytoy ti isubmitirda iti Provincial Education Office.