Arestado sa Brgy. Salvacion, Pilar, Surigao del Norte ang suspetsado sa pagpanunggab niadtong Sabado, Agosto 1 sa may alas 9:55 sa kagabhion.
Naila ang biktima nga mao si JACENTO COLDURA, 23 anyos, ulitawo ug lumulupyo sa nasampit nga lugar samtang ang suspetsado naila nga mao si TOMAS BALITE, 55 anyos, minyo ug lumulupyo usab sa nasampit nga lugar.
Sa gihimong imbestigasyon, gibutyag ni Punong Barangay Expedito Borja nga samtang sila nagpahigayon ug checkpoint sa barangay iyang gikompronta sila ni Carjun Gonzales ug Pernan Escanella, parehong 19 anyos, mga ulitawo ug mga lumulupyo sa nasampit nga barangay sa pagsuot kanunay ug face mask diin ang duruha gituohang ubos sa impluwensya sa ilimnong makahubog. Inay nga maminaw, nag isig panagan naman hinuon kini.
Usa ka ginganlan ug JACENTO COLDURA nga gituohang ubos sa impluwensya sa ilimnong makahubog ang mikompronta ngadto kang Punong Barangay Borja ug miingon nga kaya niyang manihuon o imanage ang sitwasyon.
Pagkahuman, misugo si Punong Barangay Borja ngadto sa iyang kauban nga mao si TOMAS BALITE sa pagpangayo ug assistance.
Dihang si TOMAS misakay sa iyang motorsiklo, matud pa gisumbag siya ni JACENTO nga naigo ang iyang nawong hinungdan nga siya nahagbong. Dayon iyang gibunlot ang iyang mahait nga hinagiban ug gidunggab kini ngadto kang JACENTO nga naigo sa nagkalain-laing parte sa kalawasan ug daling gidala sa Siargao District Hospital alang sa medikasyon. (Jun Prex Salubre, Ronda 6 RPN DXKS Surigao)
