Tag-aresto sa kapulisan sa General Luna an upat ka mga langyaw gumikan sa trespassing sanan grave scandal na gihimo niadtong 12:30AM sa Dominggo, Abril 16, 2023 didto sa Sunset Bar sa Siargao Bleu Resort nga nahimutang sa Barangay Catangnan, General Luna, Surigao del Norte.
Basi sa report sa kapulisan, alas 10 sa buntag mipadangat ug reklamo an tag-ija nan Siargao Bleu Resort and Spa na si Emmylou M. Abejo na nianang kaadlawon misulod diritso sa bar an upat ka foreigner na wayay pagtugot ug didto mihimo nan malaw-ay na eksena nga nasaksihan sa iban mga bisita ug mga bata.
Taghanap dajon sa kapulisan an upat ug didto sa ilang temporaryong taghuy-an sa Don Remegio Villas sa Barangay 2, General Luna sila nadakpan.
An mga suspetsado tagkilaya na German Nationals na sila si Alexander Felix Marian Tiedemann, layaki 29 anyos kaiban si Dr. Catharina Rothaas, babaje 25 anyos sanan Police Officer Danny Peter Luneberg, layaki 29 anyos ug Yke Molders, babaje na Dutch National.
An upat gitakdang kasohan nan trespassing, grave scandal sanan Violation sa Republic Act 7610.
Sa iyang bahin si Mayor Sol Matugas nagpasalamat sa kapulisan sa ilang pagresponde ug pagdakop sa upat ka langyaw. Lakip usab tagpasalamatan an mga concerned citizens nga mitabang pagtuod kon asa sila nahimutang. An General Luna abli sa tanang turista apan dili ikatugot sa kagamhanan nga pasagdan an mga malaw-ay nga buhat nga himoong lantad sa publiko ilabina nga jaoy mga kabataan. (RPN DXKS Surigao)