Padajun pa an hot pursuit operation sa mga tinugyanan sa kapulisan batok sa mga responsabling suspetsado human gilungkab an isa ka tindahan nga BETOY Auto Supply nga nahimutang sa Borromeo St., Taft, Surigao City.
Nadiskobrehan kini sa dihang pag abri sa tindahan sa ilang mga empleyado kuman na adlaw mga alas 8:00 nan buntag Pebrero 10, 2024.
An nahisgutang tindahan gipanag-ijahan ni Benson Ryan Coloma Ang, 36 anyos, layaki menyo, residente sa Borja kanto Rizal St., Washington, Surigao City.
Sa imbestigasyon ni PSMSgt. Lyndon Gerarcas nasayran nga posible duha ka suspek an milungkab sa nahisgutang tindahan.
Dugang pa sa imbestigasyon nga niagi an mga suspek sa atop nga bahin sa may comfort room ug giguba an padlock.
Nakuha sa mga suspek an Motolite automotive batteries, mga sensilyo sa drawer, Apple laptop, lubricants ug iban pang mga butang nga mokabat sa P200, 000.00 pesos.
Mga alas 11:08 nan buntag sa susama ng petsa nagpahigayon isab nan imbestigasyon an Surigao del Norte Provincial Forensic Unit sa crime scene.
Sa pagka kuman padajun pa an ila imbestigasyon aron pag ila ug pagsikop sa mga responsabling suspetsado.
(Mark James Lisondra)
