Niadtong pitsa 4 niining bulan sa Nobyembre, gi selebrar ang ika-100 nga katuigan ni Lola Maria A. Delima, nga nahimutang sa Barangay Cuarinta, San Jose, Dinagat Islands.
Gidawat ni Lola Maria ang iyahang ganti nga nagkantidad og 100,000 pesos, ug certificate of recognition gikan sa national government pinaagi sa Department of Social Welfare and Development o DSWD. Anaa ang presensya sa mga personahe gikan sa buhatan sa Provincial Social Welfare and Development Office o PSWDO nga maoy nagpaabot sa ganti ni Lola Maria.
Ang maong pahalipay subay sa Republic Act 10868 o ang Centenarians Act of 2016, ug mao kini ang paghatag og cash gift nga nagkantidad ug PhP100,000.00 sa mga Filipino centenarians. Kini usa ka kaylap nga giselebrar nga balaod, nga nagpakita nga ang nasud naghatag og angay nga pagtahud, pagdayeg, ug importansya sa atong mga lungsuranon nga moabot sa edad nga usa ka gatos.
Anaa usab ang mga personahe sa Provincial Governor’s Office nga gipanguluhan ni Gov. Nilo P. Demerey, Jr. ug pinaagi sa presensya sa Executive Assistant II sa PGO nga si Jhon Philip P. Tan, gipaabot niini ang dugang pahalipay gikan sa Provincial Government nga nagkantidad usab og 10,000 pesos.
Makita sa katawa ug mga mata ni lola Maria ang iyahang kalipay ug dakong pasalamat sa pagselebrar sa maong okasyon. Nagpabilin kini nga himsog ug lig-on pinaagi usab sa pag-atiman sa iyahang mga anak ug tibuok pamilya.
(Source: Governor Nilo “Remedy” Demerey Jr. Facebook page)