Nasikop sa Malimono Municipality Police Station iban sa Revitalized Pulis sa Barangay (RPSB) Cagtinae an duha ka indibidwal na nalambigit sa ilegal na pagpangisda kagahapon.
Si Police Colonel Laudemer M Laude, Provincial Top Cop, niila sa duha ka mga suspetsadong mananagat na isa ka 50-anyos na layaki, minyo, ug isa ka 37-anyos na layaki, minyo, parehong residente sa Purok 2, Barangay Balite, lungsod sa San Francisco.
An hiniusang operatiba sa kapulisan nihimo ug operasyon sa kampanya batok sa ilegal na pagpangisda sa tubig dagat sa munisipyo sa Barangay Cagtina-e, lungsod sa Malimono, diin nasakpan an mga malapason sa akto na naglambigit sa ilegal nga pagpangisda mga alas 11:50 nan duyom.
An mga suspek gidakop tungod sa paglapas sa Municipal Ordinance No. 06 Series of 2017 Section 67 (Unified Fisheries Ordinance of the Municipality of Malimono).
Nasakmit gikan sa ilang possession an isa ka unit sa pump boat na jaoy 13HP, isa ka unit sa nylon fish-catching net na jaoy kahoy na gunitanan, isa ka set sa lighting paraphernalia, ug lima ka kilo sa locally known na isda na “TUGNOS,” sa kantidad P1,750.00.
An mga suspek ug nasakmit na mga ebidensiya jaon kuman sa kustodiya sa Malimono Municipal Police Station ug gi-turn over sa DA/BFAR LGU lungsod sa Malimono alang sa tukmang disposasyon.
(Mark James Lisondra)