Dali tagdaya sa Caraga Regional Hospital an duha ka layaki human kini biktima sa pagpangduggab batok sa isa ka suspek nga si Chris Mahusay Ellioses, 27 anyos, layaki, laborer, elementary graduate, residente sa Purok 4, Don Julio, Brgy. Canlanipa, Surigao City. nga nahitabo sa Dropby Videoke House sa Purok 10, Punta Bilang-Bilang, Brgy. Taft, siyudad nan Surigao sa ala 1:30 an takna sa kadlawon.
Nakilay.an an duha ka biktima nga sila ni Christian Sumando Basil, 24 anyos, layaki, laborer, residente sa lungsod sa Tubod, Surigao del Norte ug si Ronald Sayon Cabil, 41 anyos, layaki, ulitawo, laborer, highschool graduate, residente sa Purok 10, Punta Bilang2x, Brgy. Taft, Surigao City.
Basi sa imbestigasyon sa kapulisan ngadto na sa nakasaksi nga si Ms. Jane Narsiso, 20 anyos na babaje, waitress, ug residente sa Purok 2, Cayutan, Brgy. Cagniog, Surigao City, mga ala 1:30 sa kadlawon kagaina samtang sija nag trabaho isip waitress ija nabantayan an suspek ug an mga biktima nga nag-inom sa managlahing lamesa.
Paglabay sa pipila ka minuto, an suspek miduol sa lamesa sa mga biktima ug sa wayay igong rason, gidunggab an biktima nga si Christian Sumando Basil gamit an ice pick naigo sa tijan.
Waya pa makontento an suspek nikuha ug isa ka botelya sa Red Horse beer ug gibunalan sa uyo an biktimang si Ronald Sayon Cabil nga maoy hinungdan sa komosyon.
Human sa insidente dali nisibat an suspek apan sa gihimong follow up operation nasikop an suspek pinaagi ni PSSg Edizon Liray sa may Purok Perlas, Brgy. Taft, Surigao City.
An duha ka mga biktima jaon kuman sa Caraga Regional Hospital alang sa pagpatambal. Narekober sa crime scene an ice oick nga gigamit sa krimen nga may sukod nga 9 ka pulgada.
Sa pagka kuman an suspek an jaon sa kustodiya sa Surigao City Police Station alang sa tukmang disposasyon. (Mark James Lisondra)