Daghan na sab na mga Surigaonon ang nakasinati nan mga pulido, dekalidad na serbisyo sa People’s Day program ni Mayor Pablo Yves L. Dumlao II.
An pito (7) ka mga purok nan Brgy. San Roque ang nalipay sa nahitabo na libreng serbisyo, kahapon na adlaw, August 18, 2023.
An programang People’s Day, na pagahimuon sa kada barangay, andam na mohatag nan nagkalain laing serbisyo bisan kun dili residente nan San Roque, diin may pipila gihapon ka mga katawhan an nagtimaan sa sunod sunod na skedyul nan People’s Day sama sa Brgy. Togbongon, sanan Brgy. Poctoy na tagpadajon an waya nila matapos na serbisyo, sa ila mga barangay.
Gitambongan sa upat ka mga konsehal nan siyudad, sila City Councilor Noel Catre Jr., City Councilor Baltazar Abian, City Coucilor Joniel Aldonza sanan ni City Councilor Christopher Bonite na mihatag nan ila tagsa tagsa ka mga mensahe kaiban sab si Mr. Karl Duanne Casurra an City Sports and Youth Consultant sa pag awhag sa mga katawhan na pahimoslan an libreng serbisyo.
Nagkasagol sagol an pangidaron na nagpamyembro sa Philippine Health Insurance Corporation tungod sa way hasol na pagpamyembro sa kapaspas na serbisyo sa tabang nan City Social Welfare and Development Office na matagaan nan certificate of indigency, ug sa dili madugay makuha ra dajun an valid I.D. na Phil Health Card.
Nahurot an mga daya na binhi na mga tanom nan City Agriculture, hamok sab mga ido an tagpanhimutoan sa libreng serbisyo nan City Veterinary.
Personal na nagpamasalat si Kapitan Jessie Laid sa waya nila tagdahom na programa nan gobyerno diin first time na nahitabo sa ila barangay.
“Tanan gusto mokari sa People’s Day, dili gajud kamo balibaran,” an unod sa mensahe ni Mayor Dumlao, sa pagpasabot na wayay angay balibaran sa paghatag nan serbisyo, ihatag an serbisyo kutob sa ila tagkinahanglan.
(Source: Surigao City PIO Facebook page)