Davao City— Unom ang patay samtang usa ang gikataho nga missing sa nahitabong sunog didto sa Purok 9-A, Adecor Compound, Poblacion, Maco, Comval Province bandang alas-3:30 sa kaadlawon Huwebes Santo.
Tungod sa paspas nga pagkuyanap sa kalayo ug nakulong ang mga biktima hinungdan nga pulos sila nangamatay sulod sa balay nga gipanag-iyahan ni Marina Villarosa.
Giila sa Bureau of Fire Protection (BFP) ang mga biktima nga sila Carmen Bilocura,55; Ian Bilucara, 24; Marjan Ardon,22: Kisses Ardon, 6 months; Rico Bilocura,19 ug Karen Bosalla,20 diin narekober ang ilang mga sunog nga lawas Samtang missing pud ang biktimang si Jane Ryle,13.
Matod pa nga nag-arkila lamang sa maong balay si Carmen Bilocura uban ang iyang mga anak. Miguwa sa inisyal nga imbestigasyon nga gituyo ang pagsunog sa balay ug ang gitudlong suspek ang live-in partner ni Carmen. Miabot sa P300,000 ang danyos sa sunog. Gidala ang patay’ng lawas sa mga biktima sa punerarya sa Maco, Comval.