CAGAYAN DE ORO CITY- Gatusan ka mga langyaw uban sa ilang pamilya nga nastranded dinhi sa Mindanao ang gipapauli na sa gobierno sakay sa sweeper flight niadtong Sabado sa gabii, matud pa sa Department of Tourism-region 10. Base sa data nga gihatag sa maong opisina, aduna nay 633 ka mga langyaw apil na Pinoy nga naghawid sa permanent residency visas ang gitabangan sa government agencies sukad niadtong bulan sa Marso nga mahibalik sa ilang kanasuran.
Niadtong adlwang Sabado, ang sweeper flight adunay 143 ka mga pasahero sakay sa Philippine Airbus 300 sa Laguindingan Airport sa Misamis Oriental. Ang maong mga langyaw uban sa ilang pamilya wala tugti nga makabiyahe sa mga miaging bulan tungod sa restriction nga geimposer sa gobierno dugtong sa Covid-19 pandemic.
Apil sa mga pasahero sa maong flight mao ang mga Australians, Americans, Koreans, New Zealanders, Canadians, Britons, Dutch, French, Japanese, Germans, Danish, Norwegians, Swedes, Qataris ug usa ka Singaporeans.
Matud pa ni Marie Elaine Unchuan, DOT Director for Northern Mindanao nga ang maong mga langyaw gipangayuan sa health certificates nga gilagdaan sa city or municipal health officers sa dapit nga ilang gipunduhan sa pagbakasyon aron pagmatuod nga wala silay sintomas labot na sa Covid-19 ug nga sila safe nga mobiyahe.
