Cebu City- Mikabat og kapin sa 800 ka swab samples sa Central Visayas ang wala pa ma-test sa coronavirus disease 2019.
Hinuon, sumala pa sa director sa Departmment of Health o DOH 7, Dr. Jaime Bernadas, gisuwayan na nila pag-atiman ang naasoyng mga backlog gumikan sa pipila ka kakulian.
Usa niini ang paghinay sa operation sa subnational laboratory sa VSMMC o Vicente Sotto Memorial Medical Center sukad niadtong Biyernes tungod sa panginahanglan sa disinfection.
Sa pangutana kanus-a mahuman ang disinfection, si Bernadas miingon nga posibleng malihok ang mga backlogs sa mosunod nga duha ka adlaw.
Gipahibawo usab ni Bernadas nga nagkinahanglan silag “automated RNA extractor” aron pagpadali sa examination sa swab samples.
Apan iyang gipanghimakak ang taho nga naguba ang polymerase chain reaction o PCR machine sa VSMMC.
Midugang si Bernadas nga umaabot na ang automated RNA extractors ug kon kini ilang magamit, makahimo na sila pag-test og gikan sa 2 ngadto sa 3 mil matag adlaw.
Ang VSMMC nagbaton og labing dakong subnational level laboratory (SNL) nga makahimo pagpahigayon sa COVID-19 testing gawas sa Luzon ug adunay kapasidad pag-test og 400 ka swab sample matag adlaw.
Gawas sa VSMMC, naa pay laing duha ka laboratoryo nga makahimo pag-test – ang Cebu TB Reference Laboratory Molecular Facility sa DOH 7 ug ARC Hospital sa Agus, Lapulapu City.