Gipaabot ni Sangguniang Panlalawigan Board Bember Kerwin Soldevilla nga katimbayayong sa Misamis Oriental E-Sports Organization (MESO) ang Sangguniang Kabataan Federation sa Misamis Oriental.
Atol sa gipahigayon nga e-sports tournament niadtong nakalabayng bulan sa usa ka mall, gibutyag ni BM Soldevilla kinsa SK Federation President sa MisOr nga adunay mga e-sports coordinator sa matag lungsod ug dakbayan nga maoy gitahasan nga mangita og players sa matag e-sport.
“Kani nga event in coordination or nahulog nga in partnership with Sangguniang Kabataan Provincial Federation of Misamis Oriental kung inyong mabantayan naa tay mga e-sports coordinators sa matag lungsod ug dakbayan ang na assign ana is ang SK so sila ang mag handle sa ilang mga teams,” matud ni Soldevilla.
Gipasabot sab niini nga ang mga E-sports coordinator maoy nangita sa ilang players sa lungsod nga maoy morepresenta ug mosalmot sa torneyo kon diin ang mga dula gilakipan sa Call of Duty Mobile (CODM), Mobile Legend, Tekken7 EN ug NBA2K.
Sa tinguha nga ma-promotar ang responsable nga pagamit sa social media gilantaw ni BM Soldevilla nga magbuhat og usa ka ordinansa aron mas mapahingusgan pa ang maong patigayon nga naghatag dakong kalambigitan sa kabatan-onan sa natad sa e-sports.
“Ang pinaka una nga mission or objective sa Misamis Oriental e-sports organization is not only for gaming but also to promote responsible social media usage. But actually we are open for that nga instead of just a resolution nga naay budget, himuon nato na nga ordinance kay naa tay nakita nga ordinansa nga pwede nato himuan sa gitawag nato nga social media awareness day nga sa atong contextual level sa ato sa Misamis Oriental so we are open for that.” Dugang pahayag niini.
Dako sab ang pasalamat ni BM Soldevilla ngadto sa suporta nga gihatag sa amahan sa lalawigan Governor Bambi Emano nga nagpamatuod sa iyang pagpangga ug suporta ngadto sa kabatan-onan.
“It is a testament on how this administration takes care and support for the youth kay nakita naman nato nga daghan na gyud gadula sa online sports or e-sports so gitagaan ta ug oportunidad to break that misconception ug instead nga ato silang pasagdan, or ato silang ignon nga dili mag dula-dula og inana why not kay gihatagan ta og oportunidad ug kahigayonan nga maka-anhi sila og para matudluan sa responsible gaming.” sinsero nga pagpasalamat ni BM Soldevilla ngadto kang Governor Bambi.
Lakip nga gipasalamatan niini ang mga coordinators sa matag lungsod tungod kay dili mahimong malampuson ang maong kalihokan kung wala ang suporta sa matag SK President sa matag lungsod nga maoy mipili ug mi-amuma sa mga players nga nag-dala sa ngalan sa ilang lungsod ug siyudad.
(Provincial Information Office – MisOr)