Tagpahibayo kuman buntag ni Governor Francisco Matugas sa Radyo Ronda an idja pasalamat sa Municipal Health Officer sa Malimono na nakasakop sa 9 ka mga mibisita sa munisipyo gamit an peke na RT-PCR test result.
Gikan an mga ini sa Manila ug sa pag-verify, waya mag issue nan negative result sa RT-PCR an Sta. Ana Hospital.
Gikatakda kuman na pasakahan nan kaso an mga nasakpan. Nanawagan isab an gobernador sa ubang Rural Health Units na susihon pagdajaw an mga dokumento sa mga bisita na gikan sa kaulohan.
Samtang an tuyo ka nagpositive sa Dapa, sa contact tracing, gikan sila sa Gigaquit. Ang nagpositive sa Gigaquit nga nakatakod sa Mayor sanan Vice Mayor nagagikan sa Manila. An mga nakakuha nan virus gikan sa Manila tagkuhaan nan specimen alang sa genome sequencing aron masuta kon ini bag-o ba na variant sa CoViD-19. Duha ka semana paabuton an resulta sa specimen examination.
Sa talitapos sa buyan nan Marso, an MDRRMO sa General Luna naka-intercept nan 12 ka local tourists gikan sa Butuan agi sa Hayanggabon port. Nag book sila sa isa ka resort na dili accredited sa DOT.
An kapulisan mipahigayon na nan checkpoint sa Alegria, Surigao del Norte.
Niadtong katapusang semana sa Marso may kasal gipahigayon sa Dapa diin an isa sa mga ninong nag positive sa RT-PCR test. Waya lituka sa gobernador an ngayan sa nagpositibo apan nagcontact tracing dajon an mga kadagkuan sa mga nakaduol kaniya.
Tag-awhagan sa gobernador an mga mayors sa Surigao del Norte na pahinumduman an ila katawhan na likayan an mga dagkung panagtigum o kondili gajud kapugngan ipatuman an physical distancing sanan sa dili enclosed na lugar.
Kuman na adlaw gikatakdang mopagawas nan supplement memorandum sa Executive Order 21-010 si Governor Francisco Matugas alang sa pagpailayom sa antigen test alang sa mga local tourists na mosuyod sa Siargao inigkahuman sa lima ka adlaw.
Sa mga mokadto sa Siargao, an dili residente kinahanglan magpakita nan negative antigen test result adisir tugotan makasuyod sa munisipyo na kadtuan. (RPN DXKS Surigao)