31.8 C
Manila
Friday, April 12, 2024

Senador Pacquiao Nakig-Dayalogo Sa Mga Mag-Uuma Sa Sarangani Province Sa Epekto Sa Rice Tariffication Law

- Advertisement -

Gipatigum ni Senador Manny Pacquiao ang mga rice farmer sa probinsya sa Sarangani aron hisgutan ang epekto sa Rice Tariffication Law o Republic Act No. 11203. Dugay na nga gimulo sa mga mag-uuma tibuok Pilipinas ang pag-ubos sa palit sa palay human nga na-aprobahan ang maong balaod Pebrero niaging tuig 2019.

Niaging adlaw nga Byernes sulod sa Sarangani Capitol Gymnasium, gipangunahan mismo sa Fighting Senator ang konsultasyon. Naka-file na si Senador Pacquiao og Senate Resolution No. 554 nga nanawagan nga sutaon ang implementasyon sa Rice Tariffication Law. Sa pagbalik sa sesyon sa Senado karong Nobyembre, lauman nga usa kini sa mga topiko nga hisgutan.

Nakigduyog sa maong dayalogo sa senador sila Congressman Ruel Pacquiao, Governor Steve Chiongbian Solon, Vice Governor Elmer De Peralta, mga board member ug mga mayores. Anaa usab nitambong ang regional director sa Department of Agriculture sa Rehiyon Dose nga si RD Arlan Mangelen, lakip na ang regional director sa National Food Authority Region 12 nga si RD Miguel Tecson, regional director sa NFA sa Rehiyon Onse nga si RD Lester Malana, Provincial Agriculturist Mr. Jonathan Duhaylungsod, mga municipal agriculturist ug si Assistant Provincial Administrator Engr. Gerald Faciol.

Segun ni Senador Pacquiao, dakog kabubut-on ang katawhang Pilipino sa mga mag-uuma aron makakaon sa matag adlaw, rason nga apil sa prayoridad sa gobyerno ang ilang kahimtang.

Nindot ang katuyuan sa Rice Tariffication Law tungod nag-siguro kini nga daghang bugas sa mga palengke pinaagi sa suplay sa bugas gikan sa mga lokal nga mag-uuma ug sa mga imported rice gikan sa gawas sa nasud. Tubag kini sa nasinatian nga rice crisis niaging mga tuig.

Tuod man, nidaghan ang suplay sa bugas sa merkado. Ang problema ang presyo na usab sa palit sa palay nga ni-barato. Dili pud dakong giubos sa presyo sa matag kilo sa bugas.

Apil sa pagasutaon ni Senador Pacquiao ang pondo nga ₱ 10 Bilyon ka pesos subay sa gilatid sa Rice Tariffication Law nga mutagana og Rice Competitiveness Enhancement Fund kon RCEF matag tuig sulod sa unom (6) ka tuig mag-ayuda sa mga mag-uuma.

Samtang, si Congressman Ruel Pacquiao nagbutyag nga maningkamot kini nga mabutangan og regional office sa PHilMech o Philippine Center for Postharvest Development and Mechanization. Suportado kini nga lakang ni Governor Solon ug nitanyag dayon og luna ang Gobernador nga katukuran sa maong regional office sa Sarangani Province. Hikutaron usab sa congressman ang kamugnaan sa opisina sa National Irrigation Authority sa Sarangani.

Subay sa Rice Tariffication Law, singkwenta porsyento (50%) sa maong Dyes Bilyones ka pesos nga RCEF ang maadto sa PHilMech aron maoy muatiman sa mga gikinahanglan nga makinarya, ekwipo ug uban pang kagamitan sa mga mag-uuma, wala pay labot ang mga binhi ug pautang nga apil gipondohan.

Nilungtad sa duha (2) ka oras ang dayalogo ni Senador Pacquiao sa mga rice farmer sa Sarangani Province. Nipadangat pud sa ilang good practices nga gipatuman, mga kasinatian, obserbasyon ug pagpaklaro sila Alabel Mayor Nonoy Salarda, Maitum Mayor Bryan Reganit, Board Member Arman Guili, Board Member George Falgui, Vice Governor De Peralta ug mga kadagkuan sa DA ug NFA.
(Provincial Information Office – Sarangani, photo courtesy by Martin Fernando Bernad Jr.)

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -