Davao City- Hugot karon nga nangandam ang Kasundaluhan aron mapugngan ang bisan unsang matang sa pagpangatake nga himuon sa Rebelding New Peoples Army atol unya sa ilahang ika-50 nga anibersaryo sa kalihukan.
Kini ang gikabutyag ni Task Force Davao Commander Leutenant Colonel Nolasco Mempin dili pa lamang dugay kinsa namahayag nga posibleng maglusad ug opensiba ang rebelding komunista karong umaabot nga Disyembre 26 bisan pa man sa gideklara nga Unilateral Ceasefire ni Copmmunist Party of the Philippines Founding Chairman Josie Maria Sison.
Kahinumduman nga nakadawat og impormasyon ang mga sakop sa 39th Infantry Battalion nga dunay plano ang mga rebelde nga molusad og katag-katag nga pagpangatake una moabot ang ilang anibersaryo sa Disyembre 26. Bisan nagdeklara og ceasefire ang komunista wa kini atbangi sa kagamhanan, ilabi na sa 39th ug 19th Infantry Battalion, Philippine Army.
Sumala pa ni Lieutenant Colonel Rhojun Rosales, 39th IB commanding officer, nga traydor ang mga NPA ug dili makompiyansahan gumikan kalit lang silang mangatake. Sa intelligence report sa 901st Brigade, nasayran nga nagtapok-tapok ang mga NPA sa tiilan sa Mount Apo sa posibleng halapad nga pagpangatake dungan sa ilang anibersaryo.