Nakigduyog kagahapong adlawa ang mga opisyales sa probinsya sa Sarangani sa balaang pagtamod sa mga kaigsoonang Muslim tibuok Pilipinas sa Eid’l Adha, usa ka national regular holiday.
Ang Eid’l Adha, pinulungang Arabic nagpasabot nga Feast of the Sacrifice, ang usa sa duha (2) ka dakong selebrasyon sa relihiyong Islam, una ang Eid’l Fitr, nga naghidumdom sa gibuhat ni Propetang Ibrahim, Abraham sa mga Kristyano, nga “ultimate sacrifice” pinaagi sa paghalad sa iyang anak tungod sa iyang bug-os nga paghigugma, pagsalig og pagtug-yan ngadto sa Ginoo kang Allah.
Inay ang iyang anak nga si Ismael, usa ka karnero ang gihalad human nasukod ug napamatud-an sa Ginoo ang hugot nga pagsalig ni Propetang Ibrahim.
Mapasalamaton na lamang sila Governor Steve Chiongbian Solon sa padayon nga paghiusa ug pagtinabangay sa entiro Muslim community ug mga LGU official aron magpabilin ang kalinaw ug kalambuan sa tibuok Sarangani Province.
Mapasalamaton pud si Governor Solon gumikan napili na usab ang probinsya sa Sarangani sa programa gitawag nga “Qorban (kur-ban) Project 2021.” Pang-apud apod kini og Halal nga mga karneng kanding ug baka sa mga kaigsoonang Moro alayon sa selebrasyon sa Eid’l Adha human sa mga sambayang o pag-ampo.
(Provincial Information Office – Sarangani)