Gibutyag ni Doctor Arvin Alejandro, ang provincial health officer sa probinsya sa Sarangani, nga walay kaso sa Coronavirus Disease o COVID-19 sa tibuok Sarangani Province.
Sa pakighinabi kaniya kagahapong adlawa, adlaw nga Dominggo, sa usa ka istasyon sa radyo sa dakbayan sa Heneral Santos, gipamahayag niini nga sa kasamtangan, walay nag-positibo sa COVID-19 sa Sarangani. Padayon lang nilang gina-monitor ang mga PUI kon person under investigation ug mga PUM o person under monitoring sa direktiba ni Governor Steve Chiongbian Solon.
May kabahin sa duha (2) ka magsuong babae nga OFW/Overseas Filipino Worker taga-lungsod sa Glan nga nag-trabaho sa nasud Japan, gikumpirma ni Doctor Alejandro nga mild symptoms lang ang nasinatian sa baynte-syete (27) anyos nga gi-konsidera nga PUI, samtang ang iyang magulang trayntay-uno (31) anyos nga PUM ang wala kini sintomas.
Wala na sila gipadugay nga mutinir pa sa regional hospital nga Southern Philippines Medical Center/SPMC didto sa Davao City. Natapos na usab ang ilang katorse (14) ka adlaw nga mandatory quarantine gikan sa ilang pag-abot sa Davao Airport niadtong Pebrero 28, nagpaabot na lang karon sa resulta sa swab test ang maong PUI kung hingpit na kining negatibo sa COVID-19.
Na-alarma ang kadaghanan human nangawala ang duha sa Glan tungod buot kini nga makahabol matud pa sa ilang byahe pabalik sa Japan. Naka-schedule na unta sila nga mupailalum sa quarantine sa dihang kalit kining nanghawa sa Glan.
Apan wala sila kaipsot sa hiniusang pwersa sa City Government sa Davao sa pamunuan ni Mayor Sarah Duterte, Bureau of Immigration ug Bureau of Quarantine sa Region 11 ug Region 12 human gipabalo sa opisina ni Doctor Alejandro sa pakigla-ayon ni Glan Mayor Vivien Yap, nga naay duha ka OFW ang nanibat. Nakita sila sa usa ka inn sa Davao City ug malinawon rapud silang nikuyog sa mga otoridad padulong sa SPMC.