Radio Philippines Network (RPN)
DXDX GenSan News Provincial News

Sarangani Province Malampuson Nga Nagpahigayon Og Pagbakuna Sa Mga Health Worker Batok Covid-19, 248 Ka Mga Hospital Worker Unang Nabakunahan

Walay dakong kakulian ang gipahigayon kagahapong adlawa, adlaw nga Domingo, Marso 7, nga pagbakuna sa unang batch sa mga health worker sa probinsya sa Sarangani, nga magpadayon karong adlawa. Gamit ang bakuna nga Sinovac gikan sa nasud China, dosentos kwarentay otso (248) ka mga trabahante sa duha (2) ka hospital sa Sarangani ang malampuson nga nabakunahan sa first dose sa Sinovac vaccine.

146 ka mga personahe ang nabakunahan sa Sarangani Provincial Hospital, samtang 102 pud sa Kiamba municipal hospital, ang Dr. Cornelio Martinez Sr. Memorial Hospital. Nauna ang duha ka hospital basi sa pag-prioritize sa Department of Health isip mga COVID-19 referral facility.

Una nga nagpabakuna aron mapakita nga luwas ang bakuna mao sila Dr. Arvin Alejandro, ang provincial health officer; Dra. Aileen Brion, ang chief of hospital sa Sarangani Provincial Hospital; ug si Dr. Gabriel Fernandez, ang chief of hospital sa municipal hospital sa lungsod sa Kiamba.

Lakip usab nakabaton sa first dose sa bakuna sila head nurse ug maoy provincial immunization coordinator Ms. Razel Bustria, provincial medical technologist Mr. Bong Yadao, ug daghan pang mga doctor, nurse, ug mga medical and non-medical personnel, apil na si Malapatan Municipal Health Officer Dr. Diomedes Remitar.

Paspas ang nahimong vaccination gumikan sa ayudang pwersa sa MHO Alabel ug MHO Malapatan nila Alabel Municipal Health Officer Dr. Honorato Fabio, Dr. Remitar, ug mga “Doctor to the Barrios” sa DOH kauban si DOH Sarangani-Gensan Officer Dr. Butch Dulduco.

Nitambong sulod sa Sarangani Provincial Hospital ug nihatag sa iyang pagpasalamat, pagdayig ug pagdasig si Governor Steve Chiongbian Solon. Anaa pud sulod sa Kiamba municipal hospital sila Mayor Bogi Martinez ug Vice Mayor Marijess Martinez-Ancheta. Dili matud pa makalimtan sa mga taga-Sarangani Province ang pagbuhis sa kinabuhi sa mga frontliner, mag-usa ka tuig na karong bulana sa Marso.

Sa dugay nga pag-ampo sa Ginoo, aduna na matud pay bakuna, sa pagpaningkamot sa nasyonal nga gobyerno. Segun ni Governor Solon, andam kini magpabakuna. Sa pagkakaron, giuna sa DOH ang mga anaa sa hospital tungod sila ang direkta ga-atubang sa mga gipang-COVID.

Daghan ang gapangutana sa 50 percent efficacy rate sa Sinovac, apan nigawas matud pa sa pagtuon nga wala nakatagamtam 100 percent og moderate to severe nga sintomas sa Coronavirus ang naturukan sa Sinovac. Walay perpekto nga bakuna bisan gani matud pa ang bakuna sa flu nga pila na ka dekada ginagamit.

Mao pud ang gibutyag nila Dr. Alejandro ug Dra. Brion. Bisan mabakunahan, dili garantiya nga dili mataptan og COVID-19, apan maayo na lang matud pa nga naay bakuna gumikan dili kini magpalala sa kahimtang sa pasyente. Batasanon sa gihapon ang pagsul-ot og face mask, face shield, manghinlo sa lawas, ug mag-physical distancing panigurado nga dili matakdan.

Hinuon dili pugson ang dili magpabakuna, hilabi na kadtong may mga balatian nang daan. Human sa baynte otso (28) ka adlaw, iturok na usab ang second dose sa Sinovac pagpakusog pa sa bakuna nga anaa na sa lawas, sa pagsuporta kana nila Senador Manny ug Congressman Ruel Pacquiao, Vice Governor Elmer De Peralta, tanang board member ug mga mayores. (Provincial Information Office – Sarangani)

Related posts

Patay’ng Lawas Ni Gerome “Jeje” L. Canicula O Nakilay-An Na Si Miss Anything

RPN

Empleyado Sa Gobyerno Dakpan Sa Anti-Drug Buy Bust Operation

RPN

Mandatory Swabbing Of COVID-19 Positive Case Close Contacts Ordered In Davao City

RPN

City’s Tourism Industry Heavily Impacted By Pandemic

RPN

Curfew Gipatuman Sa Sarangani Province

RPN

Medical Evacuation Sa Pinoy Cook, Gilusad Sa PCG

RPN

El Niño Padajon Na Tag-Preparahan Nan City Agriculture Office

RPN