Ginutigot ni Mrs. Elma Gabriel, mangidadaulo ti Micro, Small and Medium Enterprise Office ti Gobierno probinsial dagiti babassit a negosiante ditoy probinsia a saan unay a mangipangato iti presyo dagiti produktoda.
Inbunannagna a babaen iti daytoy ket maipamatmat ti naiget a suporta iti kalukagum ni gob. Matthew Marcos Manotoc a panatitinnulong ti tunggal maysa nangnangruna iti daytoy a panawen ti pandemia.
Imbalakadana kadagitoy a no kalikagumda a mataginayon ti negosioda ket masapul a mapnekda iti sangkabassit a mapagket wenno maganansia.
Inlawlawagna a dagiti Ilocano ket nasalimetmet rason a no ammona a nangina ti presyo ket saannan a kayat a gastusen pay ti kuartana.
Impalgakna a napintas a pangawis ti adu nga aggatang ti nalaka a presyo agsipud ta maysa daytoy kadagiti rason a saanen nga agbiruk pay ti sabali a paggatangan dagiti kakailian.
(Rosita Macalipis, RPN DZRL Batac Correspondent)
(Source: Provincial Government of Ilocos Norte)