Iriga City — Nakalockdown ngunian an Sangguniang Bayan kan Baao, rason tanganing dai nguna magkaigua nin session matapos na magkaigua nin close contact an sarong konsehal sa nagpositibo sa Covid-19.
Ini an kinompirmar ni Besi Alkalde Jose Malazarte, matapos na maka-olay kan Radyo Ronda kasabay kan kompirmasyon na gabos na konsejal asin mga empliyados kan Sangguniang Bayan an suguon na magsa-irarom nin self-isolation mientras na hinahalat an swab result kan saro nindang kaibahan na nagkaigua nin close contact sa nagpositibo nin covid na pamangkin kaini. Inot kaini, sa FB post ni konsehal Lucy Buena, saiyang sinabi na boot man nindang ipadagos an serbisyo sa mga namamanwaan, alagad habu nindang isakripisyo an interest asin salud kan publiko, kaya pinag-maray ni Mayor Jeff Besenio na i-lockdown nguna an opisina kan Sanggunian poon ngunian na Sept. 28 hasta Oct. 4, 2020.
An konsehal na nagkaigua nin close contact sa nagpositibo nin Covid-19 an presenti naman na yaon sa isolation asin quarantine mientras na hinahalat an resulta kan saiyang swab test sa masunod na duwa hasta tulong aldaw. (OIC Melvin Barayoga, RPN DZKI Iriga)
(Source: LGU – Baao, Camarines Sur)