Gipakawalay sala sa Sandiganbayan Second Division, ang kanhi Mayor sa Talisay City sa lalawigan sa sugbo, Johnny V. delos Reyes sa kasong kriminal nga gipasaka batok kaniya.
Niadtong 2014, gipasaka-an sa kasong falsification of public documents si delos Reyes tungod sa paggamit sa iyang posisyon aron molutaw nga gihatagan kini’g authority sa Board of Trustees (BOT) sa Talisay City College aron matudlo isip officer-in-charge (OIC) President sa maong tungha-an nga usa ka Dr. Paulus Mariae Canete.
Mitumaw ang maong kaso batok kang delos Reyes tungod sa reklamo nga gisang-at ni Dr. Richel Bacaltos, kanhi presidente sa Talisay City College.
Sa iyang reklamo ngadto sa anti-graft body, gitumbok sa complainant nga illegal ang giluwatan nga Executive Order ni delos Reyes ug kini naghatag lang og kalibog ug kaguliyang sa mga estudyante sa nahisgutang tungha-an.
Gipadayag sa complainant nga tungod sa Executive Order No. 2014-0007 ni delos Reyes nahitabo ang duha ka graduation ceremonies, duha ka enrollments ug duha usab ka entrance examinations.
Sa iyang bahin, gipasabot ni delos Reyes nga iyang gipulihan si Bacaltos isip presidente sa Talisay City College sa katarungan nga dili pa kini qualified pagpirma og mga dokumento alang sa mga mi-graduwar nga estudyante kay dili pa man kini usa ka doctorate degree holder nga maoy requirement sa Commission on Higher Education (CHED).
Subay niini, si Sandiganbayan Associate Justice Michael Frederick Musngi pinaagi sa iyang gisuwat nga desisyon, mibasura sa kaso batok kang delos Reyes gumikan sa kapakyas sa prosecution pagpamatuod nga sad-an beyond reasonable doubt ang kanhi mayor sa Talisay City.