“Wala kami nagpasirado o nagpahunong sa mga biyahe sa abyon dinhi sa Dipolog Airport partikular na ang Cebu Pacific.”
Kini ang pamahayag ni Civil Aviation Authority of the Philippines (CAAP) Administrative Officer Engr. Ralph B. Canton atul sa interview nila ni PDRRMO OIC-Engr. Dennis C. Tenorio.
Si Engr. Tenorio uban sa mga kawani sa Provincial Disaster Risk Reduction and Management Office (PDRRMO) mihimo sa panginsusi may kalabutan sa isyu nga wala na patugpahi ug abyon ang airport sa Dipolog nga anaa nahimutang sa Barangay Minaog, Dipolog City.
Ang CAAP Administrative Offier nagkanayon nga mismo ang Cebu Pacific mihukom nga kanselado ang biyahe sa dakbayan sa Dipolog tungod sa kondisyon sa runway sa airport.
Giangkon ni Engr. Canton nga kaniadtong Hulyo 17 sa hapon adunay kadaot ang 02 habagatang bahin sa runway Dipolog Airport partikular na ang nahimutang dapit sa barangay Barra, hinungdan nga gipa-kanselar sa Cebu Pacific ang biyahe niini.
Apan sa kabahin sa Philippine Airlines Inc. kon PAL nga mipadala sa ilang Safety Inspectors ug nasuta nga magamit, luwas ang maong runway nga hangtod karon padayon ang biyahe sa PAL tugpa nganhi sa DIpolog airport.
Kaganiadtong Hulyo 20 adunay mga inspector sa CebuPac ang nahidangat aron usab pagsusi nga angayan nang tugpahan sa maong abyon.
Matud pa ni Canton nga bisan sa kadaot nga natagamtaman sa maong runway apan magamit kon matugpahan gihapon kini, depende na lamang sa abyon.
Sa pagkakaron, hingpit nang naayo kon na-aspalto ang 02 south side sa Barra runway nga posibleng matugpahan karong adlaw nga Sabado. (PIC-Joeue Sacol Ramirez & Mishel Bala-Motederamos)