Nanawagan karon si konsehal Teodulfo Bong Lao ngadto sa Roads and Traffic Administration sa pagpadali pagtapos sa Local Public Transports Route Plan (LPTRP) isip usa sa mga lakang nga masulbad ang bul-og sa trapiko sa syudad. Matud ni Lao ang LPTRP usa ka mandatory requirement sa matag local government unit subay sa mando nga gipagula sa Department of Transportation ug sa Department of the Interior and Local Government.
Sa iyang special report sa konseho, si Lao nag-ingon nga ang transport route plan mao ang magdeterminar sa gidaghanon sa sakyanan nga kanunay mag-again sa National highways ug mga nag-unang kadalanan.
Siya nagtuo nga ang pagbaton sa transport route plan makamugna sa lakang nga posibleng makaalibyo sa dagan sa trapiko.
Si Lao, kinsa maoy chairman sa committee on public utilities nagbutyag nga ang Roads and Traffic Administration kon RTA pakyas sa pagpresentar sa LPTRP sa mga panagtigom nga ilang gihimo. Aduna pay mga panahon nga ang traffic department dili makahimo paghatag sa specific data nga pangayuon sa komiti ni Lao.
Hinuon, gitakda pa nga mohatag sa tubag ang RTA labot na sa komento ni Konsehal Lao.