Kabsan sa kinabuhi ang driver sa usa ka Kia Sorrento, kolor itom samtang angol usab ang 7 ka mga indibidwal human nakaengkwentro niini ang usa ka Toyota Revo color blue kaganihang alas 9:00 kapin kun kulang sa buntag, Abril 14, 2024 sa Lumbia Highway, Cagayan de Oro City.
Giila ang nakabsan sa kinabuhi nga nagmaneho sa Kia Sorrento nga usa ka retiradong Judge nga si Gael Padilla Paderangga, 72-anyos ug lumulupyo sa Smart Condominium, Upper Carmen, Cagayan de Oro City.
Samtang, angol usab ang ka-engkwentro niini nga nagmaneho sa Toyota Revo, kolor blue nga si Joshua Dequiña, 46-anyos ug residente sa Sitio Patpat, Mambuaya sa naasoy nga siyudad lakip na ang unom niini ka sakop sa pamilya.
Nadala pa sa balay tambalanan ang mga biktima alang sa tukmang medikasyon, apan gideklarang dead on arrival si Paderanga sa mga doktor.
Sa kasamtangan, nagpadayon pa ang gihimong imbestigasyon sa mga awtoridad sa hinungdan sa maong panghitabo. (Ernest Villariza)
