PITO (7) ka mga batan-ong atleta gikan sa Region 10 ang gitakdang mosangka sa 2026 Philippine Athletics Championship nga pagahimoon sa New Clark City, Capas, Tarlac gikan Hunyo 10 hangtud 14 ning tuiga.
Kini nga mga atleta magrepresentar sa Northern Mindanao alang sa usa sa pinakadakong kompetisyon sa athletics sa nasud.
Lakip sa mga musalmot si Janry Ubas sa Cagayan de Oro City nga nailhan isip SEA Games Champion ug national record holder. Kauban niya sila Jay Ar Royo ug Marc Angelo Cabiluna nga gikan sa Villanueva, Misamis Oriental.
Mopakita usab sa ilang talento sila Cesar P. Manliguez sa Misamis Occidental nga usa ka Palarong Pambansa champion ug record holder, ug SunJay D. Erbil, usa ka UAAP Season 88 finalist.
Lakip usab sa delegasyon sila Christian Jay Sungahid ug Jamil Ibrahim Radia gikan sa Bukidnon.
Kini nagpaila nga nagkahiusa ang maong mga atleta gikan sa nagkalain-laing probinsya aron ipakita ang kusog ug talento sa Region 10 ngadto sa nasyunal nga entablado.
Gilauman nga ang ilang partisipasyon sa 2026 Philippine Athletics Championships makahatag og inspirasyon sa kabatan-onan ug dugang dungog sa Northern Mindanao pinaagi sa ilang dedikasyon ug determinasyon sa sports.
Kahinumduman, suportado kanunay ni Governor Juliette Uy ang natad sa paugnat sa kusog sa probinsya pinaagi sa pagtabang sa mga kabatan-onang atleta nga mapakita ang ilang dakong potensyal sa ilang nagkadaiyang dula.
via Mis Or PIO