Arestao el un persona despues que ya alcansa conele el maga pulis ta descarga valor de seinto tres mil quinientos pesos contrabando desde un trak de carga na provincia de Zamboanga del Sur.
Si Coronel Richard Verceles, el operations chief del Area Police Command-Western Mindanao, ya nombra con el arestao persona como si Jonathan Delliva, treynta’y cuatro años el edad y residente de Barangay Calabayan, ciudad de Ozamiz.
Asegun con Veceles cay con Delliva ya cuji na acto ta descarga maga smuggled cigarillo desde un trak de carga maga alas dose veinte del Huwebes aga na Purok Tambo, Barangay New Labangan, Labangan, Zamboanga del Sur.
Asegun con Verceles cay con Delliva ya puede aresta cuando ya responde maga pulis con un informacion cay tiene ta descarga maga contrabado na Purok Tambo, Barangay New Labangan.
Si Verceles ya habla cay ya puede confisca na posesion de Delliva defirente clase de cigarillo que tiene el cantidad de seinto tres mil quinientos pesos.
Con Delliva y maga confiscao contraband ya pone bajo el custodiya de pulisiya na municipio de Labangan, Zamboanga del Sur. (B. Garcia, photo courtesy of Area Police Command- Western Mindanao)