Con dos colector de ilegal swertres ya aresta maga pulis durante campanya contra juego ilegal nombrao como el “Oplan Bolilyo” na provincia del Zamboanga Sibugay y Zamboanga del Sur.
Con el maga arestao personas ya conose como canda George Gapatan, sincuenta’y sinco años el edad y si Elvar Perolino, cuarenta’y nueve años.
Asegun con Tiniente Coronel Leo Laraga, el hefe del Criminal Investigation and Detection Group (CIDG)-Zamboanga Sibugay Provincial Field Office, cay con Gapatan ya cuji na acto ta colecta tayada de ilegal swertres maga alas tres sinco del Martes tarde na Purok Malipayon, Barangay Lambuypogan, municipio de Alicia.
Asegun con Laraga ya puede recubri na posesion de Gapatan veinte pesos markao dinero ya usa el un secreta (undercover policeman) taya ilegal suwertres, dos sientos sesenta’y cuatro pesos dinero de tayada, y otro cosas ta usa para na coleccion de tayada.
Asegun con Tiniente Benjie Tandayag, el official-en-cargao del CIDG-Zamboanga del Sur Provincial Field Office, cay con Perolino ya cuji na acto ta coleta tayada de ilegal suwertres maga alas ocho nueve del Martes denoche na calle municipal, Barangay Kapalaran, municipio de Tambulig.
Asegun con Tandayag ya puede confisca na posesion de Perolino veinte pesos markao dinero ya usa el un secreta taya ilegal suwertres, celpon, motorsiclo, un mil siento veinte sinco pesos dinero de tayada y otro cosas ta usa para na coleccion de tayada.
Si Gapatan y Perolino bajo ahora na custodiya del CIDG na Zamboanga Sibugay y Zamboanga del Sur myentras esperansao planta formal asunto contra canila. (B. Garcia)