Malampusong gipahigayon sa House Committee on Suffrage and Electoral Reforms ang ikatulo ug katapusang hugna sa ilang nationwide public consultation kabahin sa 24 ka pending Anti-Political Dynasty bills niadtong Pebrero 20, 2026 sa USTP Gymnasium dinhi sa siyudad.
Ang komite gipangulohan ni Ziaur-Rahman “Zia” Alonto Adiong, kongresista sa Unang Distrito sa Lanao del Sur. Ang maong hearing naka-focus sa pagdungog sa mga panan-aw ug suhestiyon gikan sa katawhan sa Mindanao kabahin sa mga panukalang balaod nga nagtumong sa pagdili sa political dynasties ug pagsiguro sa patas nga kahigayunan sa pagserbisyo sa gobyerno, subay sa 1987 Constitution.
Kini nga Mindanao leg misunod sa mga naunang konsultasyon nga gipahigayon sa Cavite alang sa Luzon ug sa Cebu alang sa Visayas, nga nagkumpleto sa three-island cluster approach aron matigom ang lain-laing regional inputs sa tibuok nasud.
Nagpasalamat usab ang komite kang Faustino “Bojie” Dy III ug Alexander “Sandro” Marcos sa pagpanguna sa maong inisyatiba.
Sa video message ni Speaker Dy, iyang gipasiugda ang paningkamot sa Kongreso nga mahimong inclusive ang reporma. “Karon, nagkaduol ang Kongreso kaninyo, mga igsoon sa Mindanao, tungod kay ang inyong tingog ug pagbati amo gyud kining ginapaminaw ug ginahatagan og bili,” matud niya.
Mitambong usab ang ubang miyembro sa Kamara lakip sila Hon. Jonathan Keith Flores, Hon. Sarah Jane I. Elago, Hon. Rachel Marguerite B. Del Mar, Hon. Nathaniel M. Oducado, Hon. Jennifer “Karen” A. Lagbas, ug Hon. Yevgeny Vicente B. Emano.