Inpannakkel ni Provincial Treasurer Mrs. Josephine Calajate a napintasen iti record ti gobierno probinsial iti panagbayad na iti loan iti Development Bank of th Philippines iti pannakaepasdek ti Plaza Del Norte.
Segun kenkuana, regular iti panagbayad ti probinsia iti nabulod na a kantidad ken awan ti ‘’backlog’’ wenno saan na a nabaybayadan iti naglabas a bulan.
Segun pay kenkuana, naituding nga agngudon iti may a tawen a mabayadan amin ti probinsia iti loan na ti DBP nga umabot laengne iti 975 a ribu a pisos ti bayadanna amin iti sumuno a tawen.
Kunana a nupay immunan a naiyawat iti Rivermount ti pannakamanehar iti Plaza Del Norte, nasuspenso pay laeng gapu iti krisis ti COVID-19.
Napagbalin pay laeng dayoty a quarantine facilities ti probinsia a pagyanan dagiti kailian nga aggapu iti sabali a lugar a pangpalabasanda ti 14 nga aldaw sakbay nga agawid da kadagiti bukod da a pagtaengan wenno pamilia.
Libre met iti panagyan dagitoy gapu ti ibaklay amin ti gobierno probinsial kas immunan nga inkari nga ipaay a tulong ni Gob. Matthew Marcos Manotoc ngem adda laeng bayadan dagiti maseknan a 300 a pisos ti kada aldaw. (Irene Ringor, RPN DZRL Batac Correspondent)
(Source: Provincial Government of Ilocos Norte)