Iligan City – Narekober sa mga awtoridad ang gibanabana nga P2.5 milyon nga kantidad sa gikatahapan nga copper-bearing mineral ore gikan sa usa ka abandonadong Wing Van sa Timoga, Barangay Buru-un, Iligan City niadtong Hulyo 27, 2026.
Gipahigayon ang operasyon pinaagi sa hiniusang aksyon sa City Intelligence Unit sa Iligan City Police Office (CIU-ICPO), ubang operating units sa ICPO, mga personahe sa PNP nga gi-deputize isip Mines and Geosciences Bureau (MGB) officers, uban sa koordinasyon sa ubang intelligence units sa PNP ug DENR 10–CENRO Iligan.
Matud sa report, milihok ang mga awtoridad human nakadawat og impormasyon gikan sa mga residente bahin sa usa ka asul ug pilak nga Wing Van nga gibiyaan sa maong lugar sulod na sa hapit duha ka bulan.
Misamot ang kabalaka sa mga residente human ilang namatikdan nga adunay wala mailhing mga tawo nga misulay og abli sa likod nga bahin sa sakyanan ug misulay og kuha sa kargamento niini.
Sa pag-inspeksyon sa mga awtoridad, ilang nadiskubrehan nga adunay sulod ang Wing Van nga gibana-banang 500 ka sako sa gikatahapan nga copper-bearing mineral ore.
Walay drayber o tawo nga mipaila nga tag-iya sa sakyanan ug sa kargamento ang nakit-an sa lugar. Nakumpirma usab sa pag-verify nga walay gipakitang travel permit o mga dokumento sa pagbiyahe nga may kalabotan sa pagdala sa maong mineral ore.
Sumala sa DENR 10–CENRO Iligan ug deputized MGB officer, ang nakuhang kargamento gituohang copper mineral ore nga adunay gibanabanang bili nga P2.5 milyon.
Ang abandonadong Wing Van ug ang mga nakuhang mineral ore ipailalom sa imbentaryo uban sa presensya sa mga saksi ug dayon itugyan ngadto sa DENR 10–CENRO/MGB alang sa hustong dokumentasyon, kustodiya, ug disposisyon samtang gihulat ang resulta sa megascopic analysis ug eksaminasyon gikan sa Mines and Geosciences Bureau.
Courtesy: PRO 10