Nasakpan sa kapulisan ang duha ka persona nga giingong nalambigit sa ilegal nga Swertres o Wirik-Wirik atol sa gilain-laing anti-illegal gambling operations nga gipahigayon sa Cagayan de Oro City niadtong Hulyo 23, 2026, isip kabahin sa kampanya sa kapulisan batok sa ilegal nga sugal ug pagpalig-on sa kalinaw ug kahapsay sa komunidad.
Ang unang operasyon nahitabo alas 8:38 sa gabii sa Zone 10, Barangay Cugman, diin nadakpan si Reynante Ratunil Magallano, 27 anyos, ulitawo ug giingong Swertres usher. Samtang sa laing operasyon nga gihimo alas 7:42 sa gabii sa Pinikitan, Barangay Camaman-an, nasikop usab si Rose Marie Bero, 35 anyos, ulitawo ug residente sa Barangay 35, Cagayan de Oro City. Gipangunahan ang maong operasyon sa mga operatiba sa Police Station 2 ubos sa pagmando ni PMAJ Peter Lascuña Tajor.
Sumala sa kapulisan, ang operasyon misangpot sa kalampusan sa pagdakop sa mga suspek nga giingong naglihok isip mga kolektor sa ilegal nga numbers game. Karon anaa na sila sa kustodiya sa Police Station 2, Cagayan de Oro City Police Office, ug temporaryong gipriso sa Maharlika Detention Facility samtang giandam ang kasong paglapas sa Republic Act 9287, o ang balaod batok sa ilegal nga numbers game.