El mga autoridad ya aresta un persona y ya confisca P1.4 millones valor de smuggled cigarillo na un operacion de aplicacion de ley na provincia del Zamboanga Sibugay.
El mando regional del policia, o Police Regional Office-9 (PRO-9), nohay identifica con el arestao persona, excepto de habla’r ele el chufer de vehiculo que ya coge el mga pulis ta transporta mga smuggled cigarillo.
Asegun con el policia, ya confisca con el enviao smuggled cigarillo mga alas 5:30 del Miercoles tarde na Purok Euphorbia, Barangay Lutiman, Alicia, Zamboanga Sibugay.
El policia ya habla, el mga smuggled cigarillo ya coge na un operacion de checkpoint mientras ta transporta con el cargamento para na Ipil, Zamboanga Sibugay.
El policia ya habla, ya confisca 25 cajon de cigarillo con el estimao valor na mercado de P1,432,500.00, y minivan vehiculo que ta usa na transportada del mga smuggled mercancias.
El arestao persona hunto con el confiscao cigarillo ya lleva na cuartel del policia na municipio de Alicia para el propio disposicion. (B. Garcia)