General Santos City – Nahimong mabulokon o bibo ang pag-abli ug gipahigayon nga 2 ka adlaw nga 2ND KALILANGAN HORSE SHOW AND COMPETITION nga gipasi-ugda sa LGU-Gensan pinaagi ni Gensan City Councilor.
Gi-abli kini kagahapong adlawa, Pebrero 22, 2025 (Sabado) ug molungtad pa hangtud karon adlawa, Domingo, nunot sa kasa-ulogan sa 2025 KALILANGAN FESTIVAL nga hingpit sa-ulogon ning nagsingabot nga Pebrero 27, 2025 isip selebrasyon sa kasumaran sa kamugnaan sa dakbayan sa Gensan.
Ang KALILANGAN, gikuha gikan sa pulong Maguindanaoan nga gitawag og “Kalilang” nga bu-ot ipasabot: PAGSA-ULOG O PAGHANDUM
Busa ang Kalilangan nagtumong sa panagtapok, selebrasyon, pagsadya, o hudyaka. Sa paglabay sa katuigan, ang Kalilang Festival nahimong usa sa pinakadakong kalihukan sa dakbayan matag-Pebrero 27.
Sagad sa mga kabayo ug mga horse rider nga misalmot sa nasampit nga kompetisyon gagikan sa lain-laing lungsod sa probinsiya sa Bukidnon ug ang uban gikan sa laing mga dapit sa Mindanao.
Gipahigayon ang Horse Show and Competition sa Ventilacion St. corner Emergency Road, atubangan nga bahin sa Ramon Magsaysay Memorial College (RMMC) High School, Brgy. Lagao, General Santos City. (Rem Agdon)
News&Photos: LGU-Gensan