Linawlawagan ni Mrs. Janet London, mangidadaulo ti Gender and Development Office wenno GAD ti gobierno probinsial a saan nga amin a munisipio ken siudad ditoy Ilocos Norte ket adda dagiti barangay population volunteers a maipaayan ti “Financial Assistance”
Imbatadna a dagiti karaman a munisipio ken siudad ket dagiti laeng addaan kadagiti plain barangay population volunteers wenno dagiti awanan ti sabali nga annungenda gapu ta dagitoy dagiti awan pulos ti naipaay kadakuada a tulong iti daytoy a panawen ti krisis a gubuay ti COVID-19.
Kunana a dagitoy dagiti inkiddawanda ken ni Gob. Matthew Marcos Manotoc a maipaayan ti financial assistance gapu ta nupay nagbalbalin dagitoy a frontliners ket awn a pulos ti naawatda a tulong.
Mangnamnama ni London a nupay sangkabassit laeng ti tulong nga inpaaay ti probinsia ket makatulong para iti pannakapataud dagiti inaldaw a kasapulan dagiti pamilia dagiti maseknan.
Segun kenkuana, tallo gasut tallo pulo ket tallo ti pakadagupan dagiti barangay population volunteers ditoy probinsia a maipaayan iti nasao a tulong.
Innayonna a gapu ta makitana a dakkel ti maitultulong dagiti maseknan kadagiti barbarangay ket planona a kiddawen a maipaayan dagitoy ti regular a benepisio.