Umabot iti pito ribu a tablets a nagatang manipud iti Special Education Fund ti probinsia ti inyawat ti gobierno probinsial iti Department of Education Division of Ilocos Norte.
Indauloan a mismo ni Gob. Matthew Marcos Manotoc dagiti pannakabagi ti probinsia kangrunaanna iti education office iti pannakaiyawat dagiti nasao a gadget a para kadagiti agad-adal.
Mainaig iti daytoy, naipaiman iti Dep. Ed. ti Ilocos Norte a mangpili kadagiti agad-adal a pakaipaayan dagiti nasao a tablet.
Naammoan a plano ti Dep. Ed. nga ibunong dagiti nadakamat a gadget sakbay ti panaglukat ti klase iti school year 2021-2022.
Kabayatanna, inpakaammo ni Mrs. Carolyn Juan Agcaoili ti provincial education office a maituluyen intono bigat ti pannakaipaay ti tablet kadagiti agad-adal iti ili a Burgos.
Maipalagip a naitantan ti pannakaiyawat dagiti nasao a tablet kadagiti agad- adal iti nasao nga ili itay kallabes kalpasan a kiniddaw ni Mayor Crisente Garcia a maitantan.
Dagiti nasao a tablet ket karaman kadagiti indonar ti EDC Burgos Wind iti Power Corporation iti gobierno probinsial kas panagrespondeda iti panawagan ni Gob. Manotoc a matulungan dagiti agad-adal iti daytoy a panawen ti pandemia a pannakaipatpatungpal ti “distance learning”. (Cita Macalipis, RPN DZRL Batac Correspondent)
(Source: Provincial Government of Ilocos Norte)