Cebu City – Aduna nay pipila ka pribadong tunghaan nga nagsugod sa distance learning session sukad pa niadtong Hunyo.
Kini ang gitug-an ni Director Salustiano Jimenez sa Department of Education o DepEd VII.
Sumala pa ni Jimenez, samtang sa Agosto 24 pa ang gitakdang pagbukas sa klase sa mga tunghaang publiko, ang ubang pribadong eskuylahan sa Sugbo ug Siquijor nagsugod na pagklase pinaagi a online.
Matod ni Jimenez, naay ubang tunghaan sa Siquijor nga nagsugod sa klase pagka Hunyo ug naa usay pagka Hulyo na sanglit niadtong tungora nagpabilin pa mang zero case sa coronavirus ang maong probinsiya.
Ang ubang private schools sa  Lapu-Lapu City ug Cebu Province nagklase na usab.
Gipahibawo ni Jimenez nga adunay wa makaabot og napu ka pribadong tunghaan ang nagklase na sugod niadtong Lunes.
Basi sa record, mikabat og 124,000 ka estudyante ang na-enroll sa pribadong mga eskuylahan sa rehiyon karong tuiga o baleg 38 porsyento sa 320 mil ka enrollees sa milabay ng tuig.
Hinuon, matod ni Jimenez, mahimo pang mosaka ang maong gidaghanon tungod kay dugang mga administrator sa privates schools ang gitakdang mo-encode sa ilang enrollment figures sa DepEd database karong  Agosto 15. I via Jhon Tadlip/ JTY
(Source: DepEd VII)
